વડોદરા: ઉત્તરાયણ પર્વને ધ્યાનમાં રાખી વડોદરા શહેરના વાડી પોલીસ સ્ટેશન દ્વારા વાહનચાલકોની સુરક્ષા સુનિશ્ચિત કરવા માટે વિશેષ અભિયાન હાથ ધરવામાં આવ્યું છે. પતંગની દોરીથી થનારા અકસ્માતોને અટકાવવા માટે વાડી પોલીસે આગોતરા પગલાં લઈ માનવજીવનની સુરક્ષાને પ્રાથમિકતા આપી છે.
ઉત્તરાયણ દરમિયાન ચાઇનીઝ દોરી તથા ઘાતક દોરીના કારણે ગળા, ચહેરા અને શરીરના અન્ય ભાગે ગંભીર ઇજાઓ થવાના અનેક બનાવો સામે આવ્યા છે. આ બાબતને ગંભીરતાથી લઈ વાડી પોલીસ સ્ટેશનની ટીમ દ્વારા મુખ્ય માર્ગો, ચોકડીઓ અને વાહનવ્યવહાર વધુ હોય તેવા વિસ્તારોમાં ખાસ ચેકિંગ અને પેટ્રોલિંગ કરવામાં આવી રહ્યું છે.
પોલીસ દ્વારા દ્વિચક્રી વાહનચાલકોને હેલ્મેટ પહેરવા, વાહન પર સેફ્ટી ગાર્ડ લગાવવાની સમજ આપવામાં આવી રહી છે તેમજ ધીમી ગતિ રાખી સાવચેતીપૂર્વક વાહન ચલાવવા અપીલ કરવામાં આવી છે. સાથે જ ઘાતક દોરીના ઉપયોગથી બચવા અને અન્યના જીવને જોખમમાં ન મૂકવા માટે જનજાગૃતિ ફેલાવવામાં આવી રહી છે.
વાડી પોલીસ સ્ટેશનના અધિકારીઓએ જણાવ્યું હતું કે, ઉત્તરાયણ પર્વ દરમિયાન સતત પેટ્રોલિંગ, ચેકિંગ અને જનજાગૃતિ કાર્યક્રમો ચાલુ રાખવામાં આવશે, જેથી કોઈ પણ દુર્ઘટના ન બને અને નાગરિકો સુરક્ષિત રીતે પર્વ ઉજવી શકે.
આ કામગીરીથી વાહનચાલકોમાં પોલીસ પ્રત્યે વિશ્વાસ વધ્યો છે અને સ્થાનિક નાગરિકોએ વાડી પોલીસના પ્રયાસોને સરાહનીય ગણાવ્યા છે.
