વડોદરા શહેરના હાથીખાના વિસ્તારમાં આવેલા ગેંડા ફળિયામાં આવેલા એક મકાનના બીજા માળે અચાનક આગ લાગતાં સમગ્ર વિસ્તારમાં અફરાતફરીનો માહોલ સર્જાયો હતો.
આગની જાણ થતાં તાત્કાલિક ફાયર બ્રિગેડને જાણ કરવામાં આવી હતી, જેના પગલે ફાયરના લશ્કરો ઘટના સ્થળે દોડી આવ્યા હતા અને ભારે જહેમત બાદ પાણીનો મારો ચલાવી આગને કાબૂમાં લીધી હતી.
આ આગમાં સમગ્ર ઘરવખરી સહિત લોન પર લીધેલા રોકડા પણ બળીને ખાખ થઈ ગયા હોવાનું જાણવા મળ્યું છે. જોકે સદનસીબે કોઈ જાનહાનિ થઈ નથી.
આગ લાગવાનું ચોક્કસ કારણ હાલ સુધી જાણી શકાયું નથી અને ફાયર વિભાગ દ્વારા તપાસ હાથ ધરવામાં આવી છે.
આગ લાગી તે સમયે મકાન બંધ હતું અને પરિવારજનો લગ્નપ્રસંગે બહાર ગયા હોવાની માહિતી મળી છે. ઘટનાની જાણ થતાં પરિવારના સભ્યો સ્થળ પર પહોંચી ગયા હતા.
