વડોદરા શહેરના વાઘોડિયા રોડ પર સ્થિત ઋષિ પાર્ક ચાર રસ્તા નજીક, ડી-માર્ટ તરફ જતા માર્ગ પર આજે એક ગંભીર પ્રકારનો કાર અકસ્માત સર્જાયો હતો. પૂરઝડપે આવી રહેલી કાર અચાનક ડિવાઈડર સાથે અથડાઈ જતાં નિયંત્રણ ગુમાવી પલટી ખાઈ ગઈ હતી.
અકસ્માત એટલો જોરદાર હતો કે કારના બંને એરબેગ તુરંત ખુલ્લા પડી ગયા હતા. સદ્નસીબે કાર ડ્રાઈવર કોઈ ગંભીર ઈજા વિના સુરક્ષિત રીતે બહાર આવી ગયો હતો, જેને કારણે મોટી દુર્ઘટના ટળી હતી.
ઘટનાની જાણ થતાં સ્થાનિક લોકો સ્થળ પર દોડી આવ્યા હતા. તેમની મદદથી કારને ફરી સીધી કરવામાં આવી હતી. અકસ્માતને કારણે થોડા સમય માટે માર્ગ પર અફરાતફરીનું વાતાવરણ સર્જાયું હતું અને વાહન વ્યવહાર પર અસર પડી હતી.
સ્થળ પર પોલીસે પહોંચી અકસ્માત અંગે વધુ તપાસ હાથ ધરી છે.
