વિકાસના મોટા દાવાઓ વચ્ચે નસવાડી તાલુકાના કુકરદા ગામમાંથી સામે આવેલી તસ્વીરો તંત્ર માટે આંખ ઉઘાડનારી સાબિત થઈ રહી છે. આઝાદીના દાયકાઓ બાદ પણ ગામના નસીબમાં પાકો રસ્તો ન હોવાથી લોકો આજે પણ ભારે મુશ્કેલીઓનો સામનો કરી રહ્યા છે.
રસ્તાના અભાવનું ગંભીર પરિણામ એક સગર્ભા મહિલાને ભોગવવું પડ્યું હતું. ડુક્તા ફળિયામાં પ્રસૂતિની પીડાથી કણસતી મહિલાને મદદ માટે 108 Emergency Ambulance Service ને બોલાવવામાં આવી હતી, પરંતુ કાચા રસ્તાને કારણે એમ્બ્યુલન્સ ઘર સુધી પહોંચી શકી નહોતી.
અંતે ગ્રામજનોએ માનવતાનો ઉત્તમ દાખલો આપતા મહિલાને સ્ટ્રેચર પર સુવડાવી અંદાજે એક કિલોમીટર સુધી કાચા અને ખરાબ રસ્તા પર પગપાળા ઉંચકીને એમ્બ્યુલન્સ સુધી પહોંચાડવી પડી હતી.
આ ઘટના વિકાસના દાવાઓ સામે સવાલો ઉભા કરે છે. ગામમાં મૂળભૂત સુવિધા એવા રસ્તાના અભાવે લોકો જીવના જોખમે જીવન જીવી રહ્યા છે. હવે પ્રશ્ન એ છે કે તંત્ર અને જવાબદાર અધિકારીઓ આ સમસ્યાને ક્યારે ગંભીરતાથી લઈને યોગ્ય પગલાં ભરે છે.
