જૂનાગઢ જિલ્લાના Mangrol ખાતે આજે સિવિલ કોર્ટ કેમ્પસમાં નવી સિનિયર ડિવિઝન કોર્ટનું ભવ્ય ઉદ્ઘાટન કરવામાં આવ્યું હતું. આ કાર્યક્રમ જિલ્લા જજના હસ્તે સન્માનપૂર્વક યોજાયો હતો.
નવી કોર્ટ શરૂ થવાથી માંગરોળ તાલુકાના અંતિમ વિસ્તારોમાં રહેતા લોકો, ખાસ કરીને ગરીબ અને અભણ વર્ગને હવે ન્યાય મેળવવા માટે દૂર જવાની જરૂર નહીં રહે. સિનિયર ડિવિઝન કોર્ટમાં હવે લાખો-કરોડોના દાવાઓની સુનાવણી સ્થાનિક સ્તરે જ શક્ય બનશે, જે ન્યાયિક સુલભતા તરફનું મહત્વપૂર્ણ પગલું માનવામાં આવી રહ્યું છે.
આ ઉદ્ઘાટન પ્રસંગે જિલ્લા જજ દવે, એડિશનલ જિલ્લા જજ દામોદરા, જજ ત્રિવેદી, કેશોદ ફેમિલી કોર્ટના પ્રિન્સિપાલ જજ, નવી નિયુક્ત સિનિયર સિવિલ જજ નડિયાદવાલા તેમજ માંગરોળના પ્રિન્સિપાલ સિવિલ જજ મહેતા ઉપસ્થિત રહ્યા હતા.
આ ઉપરાંત કેશોદ અને માળિયા હાટીના બાર એસોસિયેશનના આગેવાનો, સિનિયર એડવોકેટ્સ, સ્થાનિક વકીલગણ, વિવિધ તાલુકાના બાર એસોસિયેશનના સભ્યો અને અન્ય આમંત્રિત મહેમાનો મોટી સંખ્યામાં હાજર રહ્યા હતા.
કાર્યક્રમ દરમિયાન માંગરોળ બારના પૂર્વ પ્રમુખ રાજસીભાઈ ડાકીએ મહેમાનોનું સ્વાગત કર્યું હતું, જ્યારે પ્રાસંગિક પ્રવચન એડવોકેટ કાનાભાઈ ચાવડાએ આપ્યું હતું. અંતે બાર એસોસિયેશનના પ્રમુખ માવજીભાઈ ખાણિયાએ સૌનો આભાર વ્યક્ત કર્યો હતો.
કાર્યક્રમનું સંચાલન ઉદ્દઘોષક રમેશભાઈ જોશીએ કર્યું હતું.
