વડોદરાના નવીધરતી બુસ્ટરમાં લીકેજ થવાના કારણે રોડ પર પાણીની નદી વહેતી થઈ હતી, જેના કારણે હજારો લિટર પાણીનો ભારે વેડફાટ થયો હતો. બુસ્ટરની નજીકમાં બે શાળાઓ આવેલી હોવાથી અહીંથી રોજે રોજ મોટી સંખ્યામાં વિદ્યાર્થીઓ અને વાલીઓની અવરજવર રહે છે.
આ વિસ્તારમાં અલગ અલગ પાણીની લાઇનોના વાલ્વ મુકાયેલા છે અને અઠવાડિયામાં એકવાર તો લીકેજની સમસ્યા સર્જાતી જ હોય છે. લીકેજના કારણે વારંવાર ખોદકામ કરવામાં આવતું હોવાથી શાળાએ આવતાં-જતાં વિદ્યાર્થીઓ, વાલીઓ તેમજ સ્થાનિક રહીશોને પારાવાર મુશ્કેલીઓનો સામનો કરવો પડી રહ્યો છે.
વડોદરામાં પાણીની લાઇનોમાં લીકેજની સમસ્યા સામાન્ય બની ગઈ છે, જેના કારણે અનેક વિસ્તારોમાં લોકોને પીવાના પાણીની તંગીનો સામનો કરવો પડે છે. આ સમસ્યાના નિરાકરણ માટે પાલિકા તંત્ર દ્વારા કામગીરી કરવામાં આવી રહી હોવાનો દાવો કરવામાં આવે છે, છતાં પણ જમીન પર હકીકત એ છે કે આ સમસ્યા હજુ યથાવત જોવા મળી રહી છે.
