ડેસર તાલુકાના વેજપુર ખાતે આવેલી શ્રી વેજનાથ વિદ્યાલયમાં ધોરણ 10 અને 12ના બોર્ડ પરીક્ષાર્થી વિદ્યાર્થીઓ માટે શુભેચ્છા સમારંભનું આયોજન કરવામાં આવ્યું હતું. ગુજરાત રાજ્ય માધ્યમિક શિક્ષણ બોર્ડની પરીક્ષા અંતર્ગત તા. 26/02/2026ના રોજ પેટા કેન્દ્ર નંબર 3 તરીકે આવેલી શાળામાં ધોરણ 10ના કુલ 169 વિદ્યાર્થીઓ પરીક્ષા આપી રહ્યા છે.
આ અવસરે શાળાના આચાર્ય જયેશભાઈ પટેલ, શિક્ષકગણ તથા ગૌરવસિંહ પૂવાર દ્વારા વિદ્યાર્થીઓને પુષ્પગુચ્છ આપી, મોં મીઠું કરાવી અને કુમકુમ તિલક સાથે હાર્દિક સ્વાગત કરવામાં આવ્યું હતું. પરીક્ષાના આ મહત્વપૂર્ણ દિવસે વિદ્યાર્થીઓ આત્મવિશ્વાસ અને શાંત માહોલમાં પરીક્ષા આપી શકે તે માટે શાળા પરિવાર દ્વારા વિશેષ આયોજન કરવામાં આવ્યું હતું.
સાવલી-ડેસર તાલુકાના લોકલાડીલા ધારાસભ્ય કેતનભાઈ ઇનામદાર તરફથી પણ દરેક પરીક્ષાર્થીને પેન અને ચોકલેટ ભેટ સ્વરૂપે આપી શુભેચ્છાઓ પાઠવવામાં આવી હતી.
શાળા પરિવાર અને આગેવાનો દ્વારા તમામ વિદ્યાર્થીઓને ઉજ્જવળ ભવિષ્ય માટે શુભકામનાઓ પાઠવી અને તેઓ પરીક્ષામાં શ્રેષ્ઠ પ્રદર્શન કરે તેવી હાર્દિક શુભેચ્છાઓ આપવામાં આવી હતી.
