વડોદરા શહેરમાં ચાલી રહેલી વરસાદી કાસની કામગીરી દરમિયાન કોન્ટ્રાક્ટરની બેદરકારીનો વધુ એક બનાવ સામે આવ્યો છે. સોમા તળાવ નજીક આવેલી શ્યામલ રેસીડેન્સી પાસે વરસાદી કાસની કામગીરી ચાલી રહી છે, જ્યાં ખોદકામ બાદ યોગ્ય પુરાણ ન કરવામાં આવતા અકસ્માત સર્જાયો હતો.
માહિતી મુજબ કોન્ટ્રાક્ટરે સિમેન્ટ કોંક્રિટના બદલે માત્ર માટી નાખી ચરી પુરાણ કર્યું હતું. આ બેદરકારીના કારણે કોન્ટ્રાક્ટરનો પોતાનો જ સિમેન્ટ કોંક્રિટ મિક્સર મશીન ખાડામાં ફસાઈ ગયો હતો. ઘટનાથી કામકાજ અચાનક ઠપ્પ થઈ ગયું અને સ્થળ પર લોકોમાં ચર્ચા જાગી હતી.
અંતે જેસીબી મશીનની મદદથી ખાડામાં ફસાયેલા મિક્સર મશીનને બહાર કાઢવામાં આવ્યું હતું. આ ઘટનાએ શહેરમાં ચાલી રહેલી વિવિધ વિકાસકામોમાં કોન્ટ્રાક્ટરોની કામગીરીની ગુણવત્તા અને દેખરેખ અંગે ગંભીર પ્રશ્નો ઊભા કર્યા છે.
