ડભોઇ નગરપાલિકાની બેદરકારી: મહુડી ભાગોળમાં પીવાના પાણીની લાઇનમાં ફરી ભંગાણ, હજારો ગેલન પાણીનો વેડફાટ
ડભોઇ નગરપાલિકાની ઘોર બેદરકારીના કારણે મહુડી ભાગોળ વિસ્તારમાં પીવાના પાણીની મુખ્ય લાઇનમાં ફરી એકવાર મોટું ભંગાણ સર્જાયું છે. જેના પરિણામે હજારો ગેલન શુદ્ધ પીવાનું પાણી રોડ પર બેફામ રીતે વહી રહ્યું છે, જેના કારણે વિસ્તારમાં ચોમાસા જેવી સ્થિતિ સર્જાઈ છે.લાંબા સમયથી ચાલી રહેલા રોડના કામ દરમિયાન બની ઘટના
મહુડી ભાગોળ વિસ્તારમાં છેલ્લા ઘણા સમયથી રોડનું કામ ચાલી રહ્યું છે. આ કામગીરી દરમિયાન જ આજે સવારે પીવાના પાણીની પાઇપલાઇનમાં મોટું ભંગાણ પડતાં લાખો લિટર પાણીનો બગાડ થઈ રહ્યો છે. આટલી મોટી માત્રામાં પાણી રસ્તા પર વહી જતાં રાહદારીઓ અને સ્થાનિકોને ભારે હાલાકીનો સામનો કરવો પડી રહ્યો છે. બેદરકારીનું પુનરાવર્તન: અગાઉના રિપેરિંગ બાદ પણ ફરી લિકેજ સૌથી ગંભીર બાબત એ છે કે, ડભોઇ નગરપાલિકા દ્વારા આ જ જગ્યાએ અગાઉ પણ રિપેરિંગ કામગીરી કરવામાં આવી હતી. તેમ છતાં આજે સવારે ફરીથી લાઇનમાં ભંગાણ સર્જાતાં નગરપાલિકાની કામગીરીની ગુણવત્તા અને દેખરેખ સામે ગંભીર સવાલો ઉભા થયા છે. એક તરફ પાણીની અછત, બીજી તરફ વેડફાટ જ્યાં એક તરફ ડભોઇના અમુક વિસ્તારોમાં આજે પણ લોકોને પીવાના પાણી માટે વલખાં મારવા પડી રહ્યા છે, તેવા સમયે નગરપાલિકાની બેદરકારીના કારણે મહુડી ભાગોળ વિસ્તારમાં હજારો લિટર શુદ્ધ પાણીનો વેડફાટ થવો એ અત્યંત ચિંતાજનક બાબત છે. પાણી બચાવવાના સરકારી અભિયાન સામે નગરપાલિકાની આવી બેદરકારી સ્થાનિકોમાં ઉગ્ર રોષ પેદા કરી રહી છે. સ્થાનિકોની માંગ:સ્થાનિક રહીશોએ તાત્કાલિક ધોરણે આ ભંગાણનું રિપેરિંગ કરવા અને જવાબદાર અધિકારીઓ સામે પગલાં લેવાની માંગ કરી છે, જેથી આ કિંમતી જળ સંપત્તિનો બગાડ અટકાવી શકાય.
ડભોઇ નગરપાલિકા આ મામલે ક્યારે પગલાં લે છે અને આ સમસ્યાનો કાયમી ઉકેલ લાવે છે, તે જોવું રહ્યું.
