ડેસર તાલુકાના વાંકાનેડા જૂથ ગ્રામ પંચાયત વિસ્તારમાં સ્વચ્છ ભારત મિશન (ગ્રામીણ) યોજના હેઠળ મંજૂર થયેલ સામૂહિક કમ્પોસ્ટ પિટ, સામૂહિક શોકપિટ, જાહેર શૌચાલય તેમજ વાંકાનેડા સ્મશાન ગૃહમાં પેવર બ્લોકના કામોમાં કાગળ પર દર્શાવેલી કામગીરી અને સ્થળ પરની વાસ્તવિક સ્થિતિ વચ્ચે આઘાતજનક અને ગંભીર તફાવત સામે આવ્યો છે.
માહિતી અધિકાર અધિનિયમ (RTI) હેઠળ પ્રાપ્ત થયેલા સત્તાવાર દસ્તાવેજોમાં કામ પૂર્ણ થયાનું પ્રમાણપત્ર દર્શાવવામાં આવ્યું છે, પરંતુ સ્થળ પર કરાયેલી તપાસ દરમિયાન અનેક જગ્યાએ કોઈપણ પ્રકારનું કામ અસ્તિત્વમાં નથી, જ્યારે સ્મશાન ગૃહમાં પેવર બ્લોકનું કામ મંજૂર માપદંડ અને દર્શાવેલ વિસ્તાર કરતાં ઘણું ઓછું હોવાનું સ્પષ્ટ થયું છે. આ પરિસ્થિતિ સરકારી યોજનાઓની અમલવારી પર ગંભીર પ્રશ્નચિહ્ન ઊભું કરે છે.
આ સમગ્ર મામલે જાગૃત નાગરિક દ્વારા જિલ્લા વિકાસ અધિકારી, વડોદરા સમક્ષ લેખિત આવેદન રજૂ કરી તાત્કાલિક ભૌતિક ચકાસણી, સ્વતંત્ર તકનિકી તપાસ અને નાણાકીય ઓડિટ કરાવવાની માગ કરવામાં આવી છે, જેથી હકીકત જાહેર થાય અને જવાબદારી નિર્ધારિત થઈ શકે.
આ કામોમાં કુલ સરકારી રકમ રૂ. 1,66,623/- (રૂપિયા એક લાખ છાસઠ હજાર છસો ત્રેવીસ) ખર્ચ થયાનું કાગળ પર દર્શાવાયેલ છે. જાહેર નાણાંના યોગ્ય ઉપયોગ અંગે ઉભા થયેલા પ્રશ્નો હવે અવગણવા યોગ્ય રહ્યા નથી.
સરકારી યોજનાઓની વિશ્વસનીયતા અને જનહિત સાથે જોડાયેલા આ મુદ્દે તંત્ર દ્વારા તાત્કાલિક, નિષ્પક્ષ અને પારદર્શક તપાસ કરી જવાબદાર તત્વો સામે કાયદેસર કાર્યવાહી કરવામાં આવે તેવી જન અપેક્ષા વ્યક્ત કરવામાં આવી રહી છે.
