ગુજરાત મોડેલની પોલ ખૂલી! ડભોઇના શંકરપુરા ગામે ST બસ સ્ટેન્ડ છેલ્લા બે વર્ષથી ખંડિયેર: મુસાફરો હાડ થીજાવતી ઠંડી અને તાપમાં રહેવા મજબૂર
ડભોઇ એક તરફ ગુજરાત સરકાર ‘મોડેલ ગુજરાત’ની વાતો કરીને રાજ્યના વિકાસના દાવા કરી રહી છે, ત્યારે વડોદરા જિલ્લાના ડભોઇ તાલુકાના શંકરપુરા ગામની વાસ્તવિકતા આ દાવાઓની પોલ ખોલી રહી છે. ગામનું મુખ્ય ST (સ્ટેટ ટ્રાન્સપોર્ટ) બસ સ્ટેન્ડ છેલ્લા બે વર્ષથી તૂટી ગયેલી હાલતમાં છે, જેના કારણે ગામ લોકો અને મુસાફરો પારાવાર મુશ્કેલીઓનો સામનો કરી રહ્યા છે.શું છે સ્થિતિ શંકરપુરા ગામનું બસ સ્ટેન્ડ બે વર્ષ પહેલા જર્જરિત થઈને તૂટી પડ્યું હતું. બસની રાહ જોવા માટેનું આ એકમાત્ર આશ્રયસ્થાન નષ્ટ થવાથી મુસાફરો ખુલ્લા આકાશ નીચે ઊભા રહેવા મજબૂર બન્યા છે.વારંવાર રજૂઆતો છતાં તંત્ર કુંભકર્ણની નિંદ્રામાં ગામના જાગૃત નાગરિકો અને આગેવાનો દ્વારા આ અંગે વારંવાર સ્થાનિક તંત્ર અને ST નિગમ સમક્ષ રજૂઆતો કરવામાં આવી હોવા છતાં, બે વર્ષના લાંબા ગાળા બાદ પણ આ બસ સ્ટેન્ડને ફરીથી બનાવવાની કામગીરી શરૂ કરવામાં આવી નથી. તંત્રની આ નિષ્ક્રિયતા સામે ગામલોકોમાં ભારે રોષ જોવા મળી રહ્યો છે.
શિયાળાની ઠંડી અને ઉનાળાનો તાપ બન્યા યાતના બસ સ્ટેન્ડ ન હોવાને કારણે હાલમાં જ્યારે કકડતી શિયાળાની ઠંડી પડી રહી છે, ત્યારે મુસાફરો, જેમાં ખાસ કરીને વૃદ્ધો, મહિલાઓ અને વિદ્યાર્થીઓનો સમાવેશ થાય છે, તેમને ઠંડા પવનો વચ્ચે બસની રાહ જોવી પડે છે. આ ઉપરાંત, ઉનાળાના આકરા તાપમાનમાં પણ તેમને છાયા વગર ઊભા રહેવું પડ્યું હતું. બસ આવવા-જવામાં વિલંબ થાય તો પણ તેમને કલાકો સુધી આકરી ઠંડી કે ગરમી સહન કરવી પડે છે. મુસાફરો માટે આ દૈનિક યાતના સમાન બની ગયું છે. ગ્રામજનોની તંત્ર પાસે તાત્કાલિક માંગશંકરપુરા ગામના લોકોએ એકસૂરે વહીવટી તંત્ર અને ગુજરાત રાજ્ય માર્ગ વાહન વ્યવહાર નિગમ (GSRTC) સમક્ષ તાત્કાલિક ધોરણે નવું અને સુવિધાયુક્ત ST બસ સ્ટેન્ડ બનાવી આપવાની માંગ કરી છે. ગ્રામજનોનું કહેવું છે કે જો ગુજરાત સરકારે ખરેખર મોડેલ રાજ્ય બનાવવું હોય, તો તંત્રએ કાગળ પરની વાતોને બદલે જમીની સ્તરે કામ કરીને ગ્રામ્ય વિસ્તારના લોકોને પાયાની સુવિધાઓ પૂરી પાડવી જોઈએ.સ્થાનિક તંત્ર આ મામલે ક્યારે જાગૃત થશે અને મુસાફરોને રાહત મળશે તે જોવું રહ્યું.
