વડોદરા શહેરના મંડવી વિસ્તારમાં ભીડ દરમિયાન થયેલી મોટી ચોરીનો ચીનિટીવાડી પોલીસ સ્ટેશને ત્વરિત ભેદ ઉકેલી નાખ્યો છે. ખરીદી કરવા આવેલી મહિલાના પર્સમાંથી અજાણ્યા ચોરે ₹7.56 લાખના સોનાના દાગીના અને રોકડ ચોરી લીધા હતા.
પોલીસે ઘટનાસ્થળના CCTV ફૂટેજ અને ટેકનિકલ તપાસના આધારે તપાસ આગળ ધપાવી. મળેલી માહિતી પરથી પોલીસે અમદાવાદમાં છાપો મારી 4 સભ્યોની ચોરીની ગેંગને ઝડપી પાડી. તેમના કબજામાંથી ₹7.15 લાખના સોનાના દાગીના મળી આવ્યા.
પોલીસ મુજબ ગેંગ નાના બાળકોને સાથે રાખીને ભીડભાડવાળા વિસ્તારોમાં નજરચૂકીની ચોરી કરતી હતી. ઝડપી કાર્યવાહીથી મોટા મૂલ્યનો મુદ્દામાલ રીકવર થતાં પોલીસને મહત્વની સફળતા મળી છે.
