છોટાઉદેપુર જિલ્લાના નસવાડી તાલુકો ના ગઢબોરીયાદ ગામે સામુહિક આરોગ્ય કેન્દ્રના નવા બિલ્ડિંગનું લોકાર્પણ કરવામાં આવ્યું હતું. આ પ્રસંગે જિલ્લા વહીવટી તંત્રના અધિકારીઓ સાથે સ્થાનિક ધારાસભ્ય અને સાંસદ પણ હાજર રહ્યા હતા.
માહિતી મુજબ, અંદાજે 6 કરોડથી વધુના ખર્ચે બનેલું આ બિલ્ડિંગ છેલ્લા ત્રણ મહિનાથી તૈયાર હોવા છતાં ઉપયોગમાં આવતું નહોતું અને ધૂળ ખાતું પડ્યું હતું. જોકે હવે વહીવટી તંત્ર દ્વારા તાત્કાલિક આયોજન કરીને લોકાર્પણ કાર્યક્રમ યોજવામાં આવ્યો હતો.
આ આરોગ્ય કેન્દ્ર 30 બેડની સુવિધા ધરાવે છે અને નસવાડી તાલુકાની સૌથી મોટી હોસ્પિટલ બિલ્ડિંગ તરીકે વિકસિત થયું છે. કાર્યક્રમ દરમિયાન સાંસદે જણાવ્યું હતું કે આ કેન્દ્રથી આસપાસના 80થી વધુ ગામોના લોકોને આરોગ્યસેવાઓનો સીધો લાભ મળશે.
વિશેષ કરીને આદિવાસી વિસ્તારોમાં વસતા ગરીબ દર્દીઓ માટે આ હોસ્પિટલ મહત્વપૂર્ણ સાબિત થશે અને તેમને નજીકમાં જ યોગ્ય સારવાર મળી રહેશે.
