નવું વર્ષ નજીક આવતાં જ બુટલેગરો ફરી સક્રિય બન્યા હોવાનો વધુ એક ચોંકાવનારો બનાવ સામે આવ્યો છે. વડોદરા શહેરના દશરથ–ઇન્દિરા નગરી રોડ ઉપર આવેલ શિવ એસ્ટેટના ગોડાઉનમાં છાણી પોલીસે દરોડો પાડી વિદેશી શરાબનો વિશાળ જથ્થો ઝડપી પાડ્યો છે.
પોલીસે દરોડો પાડતાં જ ગોડાઉનમાં સંગ્રહિત શરાબનો જથ્થો જોઈ પોલીસ પણ ચોંકી ઉઠી હતી. તપાસ દરમિયાન ત્યાંથી અધધ… 16,752 પેટી વિદેશી શરાબ મળી આવી હતી. પોલીસે અંદાજે રૂ. 32.33 લાખથી વધુનો મુદ્દામાલ કબ્જે કર્યો હોવાનું જાણવા મળ્યું છે.
આ સમગ્ર કેસમાં શરાબની હેરાફેરી સાથે સંકળાયેલા રાજસ્થાનના પ્રકાશ સિયારામને વોન્ટેડ જાહેર કરવામાં આવ્યો છે. છાણી પોલીસ દ્વારા બુટલેગિંગના આ નેટવર્ક અંગે વધુ તપાસ હાથ ધરવામાં આવી છે અને અન્ય સંડોવાયેલા આરોપીઓને ઝડપી પાડવા કાર્યવાહી તેજ કરવામાં આવી છે.
31 ડિસેમ્બરની ઉજવણી પૂર્વે શહેરમાં કાયદો અને વ્યવસ્થા જળવાઈ રહે તે માટે પોલીસ દ્વારા સઘન ચેકિંગ અને કાર્યવાહી ચાલુ રાખવામાં આવી છે.
