વડોદરા : શહેરમાં થયેલા ચેન સ્નેચિંગના ગુનાની તપાસ દરમિયાન ક્રાઇમ બ્રાન્ચને મહત્વની સફળતા મળી છે. ચેન સ્નેચિંગના કેસની કડી ઉત્તર પ્રદેશ સુધી પહોંચી હતી, જ્યાંથી આરોપીઓ કારમાં વડોદરા આવી બાઈક ચોરી કરીને ગુનાઓને અંજામ આપતા હોવાનું ખુલ્યું હતું.
આ આરોપીને પકડવા માટે વડોદરા ક્રાઇમ બ્રાન્ચની ટીમ ઉત્તર પ્રદેશના શામલી જિલ્લાના પતની પ્રતાપુર ટોલનાકા સુધી પહોંચી હતી. અહીં ક્રાઇમ બ્રાન્ચના જવાનોએ ટોલ પ્લાઝાના કર્મચારી તરીકે વેશ પલ્ટો કરી ફિલ્મી ઢબે જાળ બિછાવી હતી.
આ ઓપરેશન દરમિયાન કુખ્યાત આંતરરાજ્ય બાવરિયા ગેંગના સાગરીત મેજરસિંગ જોગાસિંગ સિંગને દબોચી લેવામાં આવ્યો હતો. આરોપીની ધરપકડ બાદ કરવામાં આવેલી પૂછપરછમાં વડોદરા શહેરમાં થયેલા ત્રણ ચેન સ્નેચિંગના ગુનાનો ભેદ ઉકેલાયો છે.
આ કેસમાં ક્રાઇમ બ્રાન્ચે હજુ ત્રણ આરોપીઓને વોન્ટેડ જાહેર કર્યા છે અને તેમની શોધખોળ માટે કાર્યવાહી શરૂ કરવામાં આવી છે. વડોદરા ક્રાઇમ બ્રાન્ચની આ કાર્યવાહીથી શહેરમાં ચેન સ્નેચિંગ કરનારા ગુનેગારોમાં ભયનો માહોલ સર્જાયો છે.
