વડોદરા શહેરમાં ગેસ પુરવઠાને લઈને ઉભી થયેલી ચિંતાઓ વચ્ચે Vadodara Gas Limited તંત્ર એક્શનમાં આવ્યું છે. તંત્ર દ્વારા સ્પષ્ટ કરવામાં આવ્યું છે કે ઉપભોક્તાઓએ ચિંતા કરવાની જરૂર નથી અને ગેસનો પુરવઠો પૂરતો ઉપલબ્ધ છે.
શહેરમાં અંદાજે પોણા ત્રણ લાખ લોકોને પાઇપલાઈન દ્વારા ઘરેલુ અને ડોમેસ્ટિક PNG ગેસ સપ્લાય કરવામાં આવે છે. ગેસની અછતના સમાચાર વચ્ચે છેલ્લા એક અઠવાડિયામાં PNG ગેસ કનેક્શન માટે અરજીઓમાં નોંધપાત્ર વધારો થયો હોવાનું તંત્રે જણાવ્યું છે.
માહિતી મુજબ છેલ્લા એક અઠવાડિયામાં અંદાજે 400 નવી અરજીઓ મળી છે, જ્યારે 1500 જેટલા લોકો ફોર્મ લઈને ગયા છે. ફેબ્રુઆરી મહિનામાં લગભગ 1350 અરજીઓ મળી હતી. વર્ષ 2024થી અત્યાર સુધીમાં અંદાજે 5000 જેટલી અરજીઓ પેન્ડિંગ હોવાનું પણ સામે આવ્યું છે.
કોમર્શિયલ ગેસ કનેક્શન માટે પણ માંગ વધી રહી છે. અગાઉ દર મહિને 8થી 10 અરજીઓ આવતી હતી, જ્યારે માત્ર માર્ચ મહિનામાં જ 16 જેટલી વધારાની અરજીઓ મળી છે.
તંત્રએ જણાવ્યું છે કે કોમર્શિયલ કનેક્શન માટે હોસ્પિટલો, સેવાભાવી સંસ્થાઓ, શાળાઓ અને કોલેજોને પ્રાથમિકતા આપવામાં આવશે. સાથે જ Vadodara Municipal Corporation દ્વારા પણ જરૂરી પગલાં લેવામાં આવી રહ્યા હોવાનું જણાવાયું છે.
આ રીતે ગેસની વધતી માંગ વચ્ચે તંત્ર પુરવઠો જાળવી રાખવા અને નવી કનેક્શન પ્રક્રિયા ઝડપથી પૂર્ણ કરવા પ્રયત્નશીલ હોવાનું સ્પષ્ટ થયું છે.
