સાવલી તાલુકાના મોક્ષી ગામે આવેલી પ્રાથમિક શાળામાં શિક્ષકની અમાનવીય હરકત સામે આવી છે. શાળામાં પાંચમા ધોરણમાં અભ્યાસ કરતા એક નાનકડા વિદ્યાર્થીને પાઠ યોગ્ય રીતે વાંચતા ન આવડતાં શિક્ષક દ્વારા ઢોર માર મારવામાં આવ્યો હોવાનો ગંભીર આક્ષેપ થયો છે. આ ઘટનાને પગલે સમગ્ર ગામમાં રોષનો માહોલ સર્જાયો છે અને વાલીઓમાં ભારે આક્રોશ જોવા મળી રહ્યો છે.
પ્રાપ્ત માહિતી મુજબ, તારીખ 15 ડિસેમ્બર 2025ના રોજ શાળાના વર્ગખંડમાં શિક્ષણ કાર્ય દરમિયાન વિદ્યાર્થી પાઠ વાંચી ન શકતા શિક્ષક ગુસ્સે ભરાયા હતા. બાદમાં શિક્ષકે વિદ્યાર્થીને હાથ તેમજ લાકડી વડે બેફામ માર માર્યો હોવાનું જણાવાયું છે. મારના કારણે વિદ્યાર્થીને શરીરે ઇજાઓ પહોંચી હતી અને તે રડતો-રડતો ઘરે પહોંચ્યો હતો.
વિદ્યાર્થીની હાલત જોઈ માતા-પિતાએ તરત જ શાળાનો સંપર્ક કર્યો હતો. ઘટનાની જાણ થતાં ગ્રામજનો અને વાલીઓ મોટી સંખ્યામાં શાળાએ એકત્રિત થયા હતા અને દોષિત શિક્ષક સામે કડક કાર્યવાહી કરવાની ઉગ્ર માંગ ઉઠાવી હતી. વાલીઓનું કહેવું છે કે અગાઉ પણ શિક્ષક દ્વારા વિદ્યાર્થીઓ સાથે કઠોર વર્તન કરવામાં આવતું હતું, પરંતુ આ ઘટનાએ તમામ હદો પાર કરી છે.
આ મામલે શાળા સંચાલન તેમજ શિક્ષણ વિભાગને જાણ કરવામાં આવી છે. સ્થાનિક તંત્ર દ્વારા તપાસ શરૂ કરવામાં આવી હોવાનું જાણવા મળ્યું છે અને દોષિત શિક્ષક સામે નિયમ અનુસાર કાર્યવાહી કરવામાં આવશે તેવી ખાતરી આપવામાં આવી છે.
ઉલ્લેખનીય છે કે રાજ્ય સરકાર દ્વારા શાળાઓમાં શારીરિક સજા પર સંપૂર્ણ પ્રતિબંધ મૂકવામાં આવ્યો છે. તેમ છતાં આવી ઘટનાઓ સામે આવવી શિક્ષણ વ્યવસ્થાની ગંભીર નિષ્ફળતા દર્શાવે છે. બાળકોને પ્રેમ, ધૈર્ય અને સમજદારીથી શિક્ષણ આપવું જરૂરી છે, ત્યારે આવી હિંસક ઘટનાઓ સમાજ માટે ચેતવણીરૂપ બની છે.
