વડોદરા જિલ્લાના રણોલી વિસ્તારમાં GACL પ્લાન્ટ તરફ જતા રસ્તાઓ પર ઓવરલોડેડ મીઠાના ટ્રકો હવે જાહેર સુરક્ષા માટે ગંભીર ખતરો બની રહ્યા છે. ટ્રકોમાંથી સતત છલકાતા મીઠાના કારણે રસ્તા લપસણાં બની જતાં બે-વ્હીલર ચાલકો લપસી પડવાના બનાવો વધી રહ્યા છે.
સ્થાનિકોના જણાવ્યા મુજબ, મીઠું રસ્તા પર પડે તે કારણે રોજબરોજ અકસ્માતો સર્જાઈ રહ્યા છે. છતાં અત્યાર સુધી કોઈ કાયમી પગલા ન લેવાતા નાગરિકોમાં રોષ ફાટી નીકળ્યો છે.
સૌથી ચોંકાવનારી બાબત એ છે કે RTO દ્વારા ચેકિંગ થાય ત્યારે આ ઓવરલોડેડ ટ્રકો અચાનક ગાયબ થઈ જાય છે, જ્યારે સામાન્ય દિવસોમાં આ જ વાહનો ધડાધડ દોડતા જોવા મળે છે. જેના કારણે RTO, કંપની અને ટ્રાન્સપોર્ટર્સ વચ્ચે ગોઠવણની શંકા ઉઠી રહી છે.
