છોટાઉદેપુર જિલ્લાના જેતપુર પાવી તાલુકાના કાવરા ગામે પાણી પુરવઠા વિભાગના ક્વાર્ટર્સમાંથી વિદેશી દારૂનો મોટો જથ્થો મળી આવતા ખળભળાટ મચી ગયો છે. ગામલોકોએ જાતે જ ત્યાં પહોંચીને તપાસ કરતા વિદેશી દારૂની બોટલો તથા બિયારના ટીનનો જથ્થો મળી આવ્યો હતો.
પ્રાપ્ત વિગતો અનુસાર, કાવરા ગામના રહેવાસીઓએ શંકાસ્પદ ગતિવિધિઓને પગલે પાણી પુરવઠા ક્વાર્ટર્સમાં જનતા રેડ કરી હતી. અંદરથી દારૂનો જથ્થો મળી આવતા તેમણે તરત જ 112 પર ફોન કરીને પોલીસને જાણ કરી હતી. ઘટનાસ્થળે પહોંચેલી કરાલી પોલીસ સ્ટેશનની ટીમે પાણી પુરવઠા ક્વાર્ટર્સમાંથી મળેલ વિદેશી દારૂનો જથ્થો જપ્ત કરી વધુ તપાસ હાથ ધરી છે.
આ સમગ્ર ઘટનાનો વીડિયો સોશિયલ મીડિયામાં વાયરલ થતાં વિસ્તારમાં ચર્ચાનો વિષય બન્યો છે. હાલ પોલીસ દ્વારા ક્વાર્ટર્સમાં દારૂ કેવી રીતે રાખવામાં આવ્યો હતો, કોણ સંડોવાયેલું છે અને ક્યાંથી લાવવામાં આવ્યો હતો તે અંગે તપાસ કરવામાં આવી રહી છે.
હવે જોવાનું રહ્યું કે કરાલી પોલીસ સ્ટેશન આ મામલે કઈ કડક કાર્યવાહી કરે છે.
