ડભોઇ નવરાત્રિના પાવન પર્વને હવે ગણતરીના દિવસો જ બાકી રહ્યા છે, ત્યારે ડભોઇના વેપારીઓમાં ચિંતાનું મોજું ફરી વળ્યું છે. ખાસ કરીને, ડભોઇ સરદાર બાગની સામે મા અંબેની મૂર્તિઓનું વેચાણ કરતા વેપારીઓ આ વખતે ભારે મૂંઝવણમાં મુકાયા છે. આ વર્ષે અનિયમિત વરસાદને કારણે મૂર્તિઓનું વેચાણ ધાર્યા કરતાં ઘણું ઓછું થયું છે, જેની સીધી અસર વેપારીઓના ધંધા પર પડી છે વેચાણમાં 30% નો ઘટાડો
ડભોઇ અને આસપાસના તાલુકાઓમાંથી દર વર્ષે મોટી સંખ્યામાં લોકો માતાજીની મૂર્તિઓ ખરીદવા માટે આવતા હોય છે. પરંતુ આ વર્ષે સતત વરસાદ અને વાતાવરણની અનિશ્ચિતતાને કારણે ગરબાના આયોજકો અને વ્યક્તિગત ખરીદદારોની સંખ્યામાં 30% જેટલો ઘટાડો જોવા મળી રહ્યો છે.
વેપારીઓ જણાવે છે કે સામાન્ય રીતે આ સમયગાળામાં ગરબા મંડળો અને ઘરોમાં સ્થાપના માટે મૂર્તિઓની ખરીદી પૂરજોશમાં ચાલતી હોય છે, પરંતુ આ વર્ષે ગ્રાહકોની સંખ્યા ખૂબઓછી છે.વરસાદ વિલન બન્યો
નવરાત્રિ દરમિયાન મા અંબેની મૂર્તિઓ ગરબા પંડલોમાં સ્થાપિત કરવામાં આવે છે અને ભક્તો દ્વારા આરતી અને પૂજાનું આયોજન થાય છે. પરંતુ, વરસાદને કારણે મૂર્તિઓ બનાવતા અને તેનું વેચાણ કરતા વેપારીઓ માટે આ સિઝન નબળી સાબિત થઈ રહી છે. ગરબાના આયોજનો પર પણ વરસાદનું જોખમ તોળાઈ રહ્યું છે, જેના કારણે ઘણા આયોજકો મૂર્તિ ખરીદવામાં ઉતાવળ કરતા નથી. જો આ જ પરિસ્થિતિ ચાલુ રહેશે તો વેપારીઓને મોટું નુકસાન થવાની ભીતિ છે.
આ પરિસ્થિતિને જોતાં, વેપારીઓ આશા રાખી રહ્યા છે કે આવનારા દિવસોમાં વરસાદ અટકે અને વેચાણમાં વધારો થાય, જેથી તેમનું નુકસાન ભરપાઈ થઈ શકે.
