વડોદરા શહેરમાં વધુ એક બેદરકાર કારચાલકના કારણે અકસ્માતની ઘટના સામે આવી છે. ઐયપ્પા મેદાન પાસે ઓવર સ્પીડમાં આવી રહેલા કારચાલકે નિયંત્રણ ગુમાવતા અકસ્માત સર્જ્યો હતો.
માહિતી અનુસાર, કારચાલક નશાની હાલતમાં હોવાની આશંકા વ્યક્ત કરવામાં આવી રહી છે. પાછળથી આવતા એક બાઈક સવાર દ્વારા કારચાલકનો વીડિયો ઉતારવામાં આવ્યો હતો, જેમાં તેની બેદરકારી સામે આવી હોવાનું કહેવાય છે.
અકસ્માત દરમિયાન કારએ પહેલા એક લારીને ટક્કર મારી હતી અને ત્યારબાદ બેરિકેટ મારેલા ખાડામાં ખાબકી ગઈ હતી. ઘટનાના પગલે સ્થળ પર મોટી સંખ્યામાં લોકોના ટોળા ઉમટી પડ્યા હતા.
ઘટનાની જાણ થતા પોલીસ તાત્કાલિક ઘટના સ્થળે દોડી આવી હતી અને કારચાલકને અટકાયત કરી વધુ તપાસ હાથ ધરી છે. અકસ્માતને લઈ કારચાલક નશામાં હતો કે નહીં તે અંગે પણ પોલીસ દ્વારા તપાસ કરવામાં આવી રહી છે.
