વડોદરા: આગામી થર્ટી ફર્સ્ટ ડિસેમ્બરની ઉજવણીને લઈને બુટલેગરો સક્રિય બન્યા છે, ત્યારે પોલીસ દ્વારા દારૂ ઘુસાડવાના પ્રયાસોને નિષ્ફળ બનાવવામાં આવી રહ્યા છે. આજવા રોડ વિસ્તારમાં PCB (પોલીસ કંટ્રોલ બ્રાન્ચ)ની ટીમે કાર્યવાહી કરીને મોટા પ્રમાણમાં વિદેશી દારૂનો જથ્થો ઝડપી લીધો છે.
માહિતી મુજબ આજવા રોડ કમળા નગર, નેહરુચાચા નગરમાં મકાન નં. 716માં રહેતો મયુર ખાવડિયા પોતાના મકાનની સામે આવેલા બંધ મકાનના કમ્પાઉન્ડમાં શરાબનો જથ્થો સંતાડી રાખી ગેરકાયદે વેચાણ કરતો હતો. મળેલી બાતમીના આધારે PCBની ટીમે રેડ કરતા સ્થળ પરથી મોટી માત્રામાં દારૂનો જથ્થો મળી આવ્યો હતો.
પોલીસે સ્થળ પરથી અંદાજે રૂપિયા 3.16 લાખનો મુદ્દામાલ કબજે કરી આરોપીની અટકાયત કરી છે. સાથે જ દારૂનો જથ્થો પૂરું પાડનાર પ્રવીણ રાઠવા નામના ઈસમને વોન્ટેડ જાહેર કરી તેની ધરપકડ માટે તપાસ શરૂ કરવામાં આવી છે.
