વડોદરાના દેણા બ્રિજ પર આજે એક વિચિત્ર અને ગંભીર અકસ્માત સર્જાયો હતો. સુરતથી અમદાવાદ તરફ જઈ રહેલી ટ્રક સામે અચાનક એક કાર આવી જતા ટ્રક ડ્રાઈવરે તાત્કાલિક બ્રેક મારી હતી. જોકે આ બ્રેકના ઝટકાથી ટ્રકના પાછળના ભાગમાં ભરેલી લોખંડની એંગલો આગળ ધસી આવી અને કેબિન તોડી અંદર ઘૂસી ગઈ હતી.
આ ઘટનામાં ટ્રક ડ્રાઈવર નારાયણ જગદીશ રબારીના બંને પગ સ્ટીયરિંગ અને લોખંડની એંગલો વચ્ચે ફસાઈ જતા તેઓ ગંભીર રીતે ઘાયલ થયા હતા. અકસ્માતની જાણ થતાં જ પાણીગેટ ફાયર સ્ટેશનની ટીમ આધુનિક સાધનો સાથે ઘટનાસ્થળે પહોંચી હતી.
ફાયર બ્રિગેડના જવાનોએ હાઈડ્રોલિક કટર વડે સ્ટીયરિંગ અને સીટ કાપી ભારે જહેમત બાદ ડ્રાઈવરને સુરક્ષિત રીતે બહાર કાઢ્યા હતા. ત્યારબાદ તેમને તાત્કાલિક સારવાર માટે હોસ્પિટલ ખસેડવામાં આવ્યા હતા.
ફાયર બ્રિગેડની ઝડપી અને સતર્ક કામગીરીને કારણે એક વધુ જીવ બચ્યો હોવાનું સ્થળ પર હાજર લોકોએ જણાવ્યું હતું.
