વડોદરા શહેરના ઈલેકશન વોર્ડ નંબર 12માં વિકાસકામોને ગતિ આપવાના હેતુસર અકોટા વિધાનસભાના ધારાસભ્ય ચૈતન્યભાઈ દેસાઈની ગ્રાન્ટમાંથી વિવિધ વિકાસકામોનું ખાતમુહૂર્ત કરવામાં આવ્યું. કુલ રૂ.85 લાખના વિકાસકામોનું ખાતમુહૂર્ત ધારાસભ્ય ચૈતન્યભાઈ દેસાઈના હસ્તે કરવામાં આવ્યું હતું.
આ અંતર્ગત વોર્ડ નં. 12માં આવેલા મિહિર પાર્ક કો-ઓપરેટિવ હાઉસિંગ સોસાયટીમાં આંતરિક રસ્તાનું આર.સી.સી. કામ શરૂ કરવા ખાતમુહૂર્ત કરવામાં આવ્યું હતું. સાથે જ અકોટા ચાર રસ્તા પાસે આશાપુરી કો-ઓપરેટિવ સોસાયટીમાં નવીન ડ્રેનેજ લાઈન નાખવાના કામનું પણ ખાતમુહૂર્ત કરાયું હતું.
આ પ્રસંગે કાઉન્સિલર મનીષભાઈ પગાર, કાઉન્સિલર સ્મિત પટેલ, કાઉન્સિલર રીટાબેન સિંગ, કાઉન્સિલર ટીંકલબેન ત્રિવેદી, વોર્ડ નં. 12ના પ્રમુખ હાર્દિક પટેલ તેમજ વિસ્તારના કાર્યકર્તાઓ અને સ્થાનિક નાગરિકો મોટી સંખ્યામાં ઉપસ્થિત રહ્યા હતા.
ધારાસભ્ય ચૈતન્યભાઈ દેસાઈએ જણાવ્યું હતું કે, વોર્ડના સર્વાંગી વિકાસ માટે જરૂરી મૂળભૂત સુવિધાઓ ઉપલબ્ધ કરાવવાનું પ્રાથમિક ધ્યેય છે અને આવનારા સમયમાં પણ આવા વિકાસકામો સતત ચાલુ રહેશે.
