વડોદરા શહેરના ગોરવા વિસ્તારમાં આચાર્ય હોસ્પિટલની બાજુમાં આવેલી એક બાંધકામ હેઠળની ઈમારતમાં હૃદયદ્રાવક અકસ્માત સર્જાયો છે. રમતા રમતા મકાનના બીજા માળેથી પડી જતા બે વર્ષીય બાળકનું મોત થયું છે.
પ્રાપ્ત માહિતી અનુસાર, ગોરવા વિસ્તારમાં મજૂરો દ્વારા એક મકાનનું બાંધકામ ચાલી રહ્યું હતું. આ મકાનમાં આયુષ નાયક નામનો બે વર્ષનો બાળક રહેતો હતો. પરિવાર ગઇકાલે જ પોતાના ગામડેથી પરત આવ્યો હતો. આજે વહેલી સવારે માતા અને પિતા કામ પર લાગી ગયા હતા, તે દરમિયાન બાળક રમતા રમતા બીજા માળેથી નીચે પડી ગયો હતો.
ગંભીર રીતે ઈજાગ્રસ્ત બાળકને તાત્કાલિક ગોત્રી હોસ્પિટલ લઈ જવાયો હતો, જ્યાં ફરજ પરના ડોક્ટરોએ તેને મૃત જાહેર કર્યો હતો.
ઘટનાની જાણ થતાં પરિવાર પર દુઃખનો પહાડ તૂટી પડ્યો હતો. ખાસ કરીને બાળકની માતા આભ તૂટી પડ્યા હોય તેવા કરુણ દ્રશ્યો સર્જાયા હતા. સમગ્ર વિસ્તારમાં શોકનો માહોલ છવાઈ ગયો છે.
પોલીસ દ્વારા ઘટનાની નોંધ લઈ વધુ તપાસ હાથ ધરવામાં આવી છે. બાંધકામ સ્થળે સુરક્ષા વ્યવસ્થાના અભાવને લઈ પણ પ્રશ્નો ઊભા થયા છે.
