વડોદરાના મકરપુરા જીઆઇડીસી વિસ્તારમાં આવેલી વર્મા એન્જિનિયરિંગ નામની કંપનીમાં તસ્કરો દ્વારા મોટી ચોરીની ઘટના સામે આવી છે. ગત 20 તારીખની વહેલી સવારે લગભગ ચાર વાગ્યાના સમયે તસ્કરોએ કંપનીમાં ઘુસીને SSની પ્લેટોની ચોરી કરી હતી અને ફરાર થઈ ગયા હતા.
ચોરીમાં અંદાજે ત્રણ લાખ રૂપિયાની કિંમતની SS પ્લેટો ઉઠાવી લેવાઈ હોવાનું કંપનીના માલિકે જણાવ્યું છે. આ મામલે મજલપુર પોલીસ સ્ટેશનમાં ચોરીની ફરિયાદ નોંધાવવામાં આવી છે.
મહત્વની વાત એ છે કે સમગ્ર ચોરીની ઘટના કંપનીમાં લગાવેલા CCTV કેમેરામાં કેદ થઈ છે. CCTV ફૂટેજ મુજબ ચાર તસ્કરો ટેમ્પામાં આવી કંપનીમાં પ્રવેશ કરે છે અને SS પ્લેટો ભર્યા બાદ ટેમ્પામાં લઈ ફરાર થઈ જાય છે.
પોલીસ દ્વારા CCTV ફૂટેજના આધારે તસ્કરોની ઓળખ અને પકડ માટે તપાસ શરૂ કરવામાં આવી છે. હવે જોવાનું રહ્યું કે પોલીસ કેટલાં સમયમાં આરોપીઓને ઝડપી પાડી ચોરીનો ભેદ ઉકેલે છે.
