ફતેગંજ પોલીસ સ્ટેશન નજીક સર્જાઈ અફરાતફરી
વડોદરા શહેરમાં અમદાવાદ ક્રાઈમ બ્રાન્ચના પોલીસ જવાનો દ્વારા અકસ્માત સર્જાયો હોવાની ઘટના સામે આવી છે. ફતેગંજ પોલીસ સ્ટેશન પાસે આ અકસ્માત સર્જાયો હતો, જ્યાં પોલીસ જવાનો લૂંટના એક આરોપીને વડોદરાથી પકડી લઈ જઈ રહ્યા હતા.
અકસ્માત દરમિયાન પોલીસ વાહને બે થી ત્રણ અન્ય વાહનોને અડફેટે લીધા હતા, જેના કારણે સ્થળ પર અફરાતફરીનો માહોલ સર્જાયો હતો. અચાનક બનેલી આ ઘટનાથી આસપાસ ભીડ એકત્ર થઈ ગઈ હતી.
અકસ્માત બાદ સ્થાનિક લોકોએ કારને ઘેરી લઈને પોલીસ જવાનોનો ઉધડો લીધો હતો અને ભારે હોબાળો મચાવ્યો હતો. ઘટનાની ગંભીરતા જોતા પરિસ્થિતિ તંગ બની હતી.
જોકે, ઘટના અંગે જાણ થતાં જ ફતેગંજ પોલીસ સ્ટેશનના જવાનો તાત્કાલિક સ્થળ પર પહોંચ્યા હતા અને પરિસ્થિતિને કાબૂમાં લઈ મામલો થાળે પાડ્યો હતો.
હાલ ઘટનાને લઈને વધુ તપાસ હાથ ધરવામાં આવી રહી છે. હવે જોવાનું રહ્યું કે અકસ્માત અંગે પોલીસ વિભાગ દ્વારા શું કાર્યવાહી કરવામાં આવે છે.
