Kavant, Chhota Udaipur જિલ્લામાં હોળીના પર્વ નિમિત્તે પરંપરાગત અને વિશ્વવિખ્યાત Kavant Gher Fair નો ભવ્ય મેળો યોજાયો હતો. આ મેળામાં મોરપીંછની ટોપી અને શરીરે સફેદ માટીના ટપકા સાથે લયબદ્ધ નૃત્ય કરતા ઘેરિયાઓ સૌના આકર્ષણનું કેન્દ્ર બન્યા હતા.
ઉત્સવપ્રિય આદિવાસી સમાજમાં Holi પર્વને વિશેષ મહત્વ આપવામાં આવે છે. હોળીના ત્રીજા દિવસે કવાંટ ખાતે દર વર્ષે ગેરના મેળાનું આયોજન કરવામાં આવે છે. આ પ્રસંગે આદિવાસી સમાજ લોકવાદ્યોના તાલે ઝૂમી ઉઠ્યો હતો અને પરંપરાગત નૃત્ય દ્વારા મેળાની મોજ માણી હતી.
આ મેળાને માણવા માટે માત્ર છોટાઉદેપુર જિલ્લાથી જ નહીં પરંતુ ગુજરાત, મહારાષ્ટ્ર અને મધ્યપ્રદેશ સહિત દેશના વિવિધ ભાગોમાંથી તેમજ વિદેશી સહેલાણીઓ પણ મોટી સંખ્યામાં ઉમટી પડ્યા હતા.
મેળા દરમિયાન કોઈ અનિચ્છનીય બનાવ ન બને તે માટે Gujarat Police અને જિલ્લા પોલીસ દ્વારા ચાકચૌબંદ સુરક્ષા વ્યવસ્થા ગોઠવવામાં આવી હતી. યાતાયાત નિયંત્રણ સહિત કાયદો અને વ્યવસ્થા જળવાઈ રહે તે માટે પોલીસ દ્વારા ખડેપગે ફરજ બજાવવામાં આવી હતી.
ગેરના મેળા દરમિયાન વિવિધ વેશભૂષામાં સજ્જ ઘેરિયાઓએ સમગ્ર કવાંટ નગરમાં ગેરિયા નૃત્ય કરી ઘેર ઉઘરાવી હતી. સ્થાનિક યુવા અગ્રણી મુકેશભાઈ રાઠવાએ જણાવ્યું હતું કે આદિવાસી સમાજ પરિવાર, સમાજના કલ્યાણ તેમજ ખેતી અને પશુપાલન માટે માનતા રાખે છે. આ માનતા પૂર્ણ કરવા માટે લોકો ઘેરૈયા અથવા બુઢિયા બની શરીરે સફેદ ટપકા કરી અને માથે મોરપીંછનો મુગટ ધારણ કરી ટોળકીઓમાં લોકવાદ્યોના તાલે નૃત્ય કરે છે.
ગામે ગામ ફરીને નૃત્ય કરતા આ ઘેરિયાઓને ગામલોકો દ્વારા અનાજ અને નાણાં બક્ષિસ સ્વરૂપે આપવામાં આવે છે. પરંપરા, સંસ્કૃતિ અને લોકઆસ્થાનો અનોખો સંગમ બનતો આ ગેરનો મેળો દેશ-વિદેશના પ્રવાસીઓ માટે પણ વિશેષ આકર્ષણ બની રહ્યો છે.
