સાવલી ખાતે પવિત્ર રમઝાન માસના અંતિમ તબક્કા દરમિયાન મુસ્લિમ બિરાદરીમાં ભારે ઉત્સાહ જોવા મળી રહ્યો છે. આ અવસરે સાવલીના શિહોરાભાગોળ વિસ્તાર માં દર વર્ષની પરંપરા મુજબ 25મા રોજાના દિવસે સામુહિક ઈફતાર પાર્ટીનું આયોજન કરવામાં આવ્યું હતું.
આ પ્રસંગે શિહોરાભાગોળના યુવકો દ્વારા જમાતખાના ખાતે ભવ્ય ઈફતાર પાર્ટી યોજાઈ હતી. જેમાં મસ્જિદના ઈમામ અને મૌલવી સાહેબે રોઝા ઈફતાર કરવાની નિયત પઢાવી હતી અને ત્યારબાદ સૌએ સામુહિક રીતે ઈફતારી કરી હતી.
કાર્યક્રમમાં અગ્રણીઓ, યુવકો, મહિલાઓ તેમજ બાળ રોઝદારોએ મોટી સંખ્યામાં ભાગ લીધો હતો. સૌએ સાથે મળી રોઝા ઈફતાર કર્યા અને વિશ્વમાં અમન અને શાંતિ માટે દુઆ પણ કરી હતી.
ઈફતાર બાદ ઉપસ્થિત લોકો માટે સામુહિક ભોજનની પણ વ્યવસ્થા કરવામાં આવી હતી, જેના કારણે સમગ્ર કાર્યક્રમમાં ભાઈચારો અને સૌહાર્દનો સુંદર માહોલ જોવા મળ્યો હતો.
