વડોદરા શહેરના તાંદલજા વિસ્તારમાં આવેલા સનફાર્મા રોડ પર ગેલેક્ષી હોસ્પિટલની બાજુમાં આવેલી લેન્ડમાર્ક ફર્નિચર દુકાનમાં રૂપિયા લેતી-દેતીના મામલે હિંસક બનાવ સર્જાયો હતો. દુકાનના માલિક યામીનભાઈ સાથે બહારથી આવેલા ચાર જેટલા ઇસમોએ ઉગ્ર બોલાચાલી બાદ લાકડાના ફટકાથી હુમલો કર્યો હોવાની માહિતી મળી છે.
આ હુમલામાં દુકાનમાં ભારે તોડફોડ કરવામાં આવી હતી તેમજ બહાર પાર્ક કરેલી ગાડીઓને પણ નુકસાન પહોંચાડવામાં આવ્યું હોવાનું સામે આવ્યું છે. અચાનક બનેલી ઘટનાથી સમગ્ર વિસ્તારમાં અફરાતફરી ફેલાઈ ગઈ હતી અને સ્થાનિકોમાં ભયનો માહોલ સર્જાયો હતો.
બનાવની જાણ થતાં જ જે.પી. રોડ પોલીસ તાત્કાલિક ઘટના સ્થળે પહોંચી હતી અને પરિસ્થિતિ કાબૂમાં લઈને કાયદેસરની કાર્યવાહી હાથ ધરી હતી. પોલીસે આસપાસના સીસીટીવી ફૂટેજ સહિતના આધારોના આધારે તપાસ શરૂ કરી છે.
શહેરમાં આવી હિંસક ઘટનાઓ સામે પોલીસ દ્વારા કડક કાર્યવાહી કરવામાં આવી રહી હોવાનું પણ પોલીસ તરફથી જણાવવામાં આવ્યું છે.
