નસવાડી તાલુકામાં તાલુકા પંચાયત અને જિલ્લા પંચાયતની આવનારી ચૂંટણીઓને લઈ રાજકીય માહોલ ગરમાયો છે. આમ આદમી પાર્ટી દ્વારા તાલુકાની ગલીએ–ગલીએ પોસ્ટરો લગાવવામાં આવતા સ્થાનિક રાજકીય ચર્ચાઓ તેજ બની છે.
“ના બેટાનું ના બાપુ, હવે ગુજરાત આપણું” જેવા નારા સાથે લગાવવામાં આવેલા પોસ્ટરો દ્વારા પાર્ટીએ પોતાની હાજરી નોંધાવી છે. આ પ્રવૃત્તિથી તાલુકામાં ઉત્સાહ સાથે ચર્ચાનો માહોલ સર્જાયો હોવાનું જણાય છે.
સ્થાનિક લોકોમાં આ પોસ્ટરોને લઈ મિશ્ર પ્રતિભાવ જોવા મળી રહ્યા છે. કેટલાક લોકો તેને રાજકીય બદલાવની શરૂઆત તરીકે જોઈ રહ્યા છે, જ્યારે કેટલાકે તેને ચૂંટણી પૂર્વની સામાન્ય રાજકીય કવાયત ગણાવી છે.
ઉલ્લેખનીય છે કે તાલુકા પંચાયત અને જિલ્લા પંચાયતની ચૂંટણી નજીક આવતા તમામ રાજકીય પક્ષો પોતાની તૈયારીઓમાં જોતરાયા છે. આવનારા દિવસોમાં નસવાડી તાલુકામાં રાજકીય ગતિવિધિઓ વધુ તેજ બનવાની શક્યતા વ્યક્ત કરવામાં આવી રહી છે.
