ગળતેશ્વર તાલુકાના સોઢોલી ગામે આવેલી પીએમ શ્રી શાળામાં આજે ઉત્સાહભર્યો માહોલ જોવા મળ્યો હતો. શાળામાં શિક્ષણની સુવિધાઓમાં વધારો કરતા નવનિર્મિત ત્રણ વર્ગખંડોનું આજ રોજ વિધિવત લોકાર્પણ કરવામાં આવ્યું હતું.
સોઢોલી ગામના યુવા અને ઉત્સાહી સરપંચ શ્રી રવિ જોષી દ્વારા શાસ્ત્રોક્ત વિધિ બાદ રિબિન કાપી નવા વર્ગખંડોને વિદ્યાર્થીઓના અભ્યાસ માટે ખુલ્લા મૂકવામાં આવ્યા હતા. આ પ્રસંગે સરપંચે જણાવ્યું હતું કે શાળામાં ભૌતિક સુવિધાઓ વધવાથી ગામના બાળકોને વધુ સારો અભ્યાસનો માહોલ મળશે અને શિક્ષણનું સ્તર વધુ ઊંચું આવશે.
આ લોકાર્પણ પ્રસંગે એસ.એમ.સી.ના તમામ સભ્યો, ગામના વિવિધ ક્ષેત્રોના આગેવાનો, શાળાનો શૈક્ષણિક સ્ટાફ તેમજ વાલીઓ મોટી સંખ્યામાં ઉપસ્થિત રહ્યા હતા. નવા વર્ગખંડો મળતા શાળાના બાળકોમાં પણ ઉત્સાહ અને આનંદની લાગણી જોવા મળી હતી.
કાર્યક્રમના અંતે એસ.એમ.સી.ના સભ્યો તથા ગ્રામજનોએ શાળાને મળેલી આ નવી સુવિધા બદલ તંત્ર અને જિલ્લા પંચાયતનો આભાર વ્યક્ત કર્યો હતો.
