ખેડા જિલ્લાના સેવાલિયા પોલીસને મોટી સફળતા મળી છે. અમદાવાદ-ઈન્દોર હાઈવે પર આવેલી મહારાજના મુવાડા ચેકપોસ્ટ પરથી પોલીસે ઓરિસ્સાના બે શખ્સોને લાખોની ચાંદી સાથે ઝડપી પાડ્યા છે.
સેવાલિયા પોલીસ મથકના પી.આઈ. ઝાલા સાહેબના માર્ગદર્શન હેઠળ ચાલી રહેલી વાહન ચેકિંગ કામગીરી દરમિયાન પોલીસે શંકાસ્પદ જણાતા બે ઈસમોને અટકાવ્યા હતા. તેમની પાસે રહેલા સામાનની તપાસ કરતા 6.980 કિલો ચાંદીના ભગવાનના દાગીના અને મૂર્તિઓ મળી આવ્યા હતા, જેની બજાર કિંમત આશરે ₹12,50,500 જેટલી હોવાનું સામે આવ્યું છે.
પોલીસની સઘન પૂછપરછ દરમિયાન બંને આરોપીઓએ કબૂલાત કરી હતી કે તેઓએ આ ચાંદીનો માલ ઓરિસ્સાના સાઈબાબા મંદિરમાંથી ચોરી કર્યો હતો. આ રીતે આંતરરાજ્ય સ્તરે ચોરી કરીને ફરાર થઈ રહેલા આરોપીઓને ઝડપી પાડીને પોલીસે મહત્વપૂર્ણ ગુનાનો ભેદ ઉકેલ્યો છે.
સેવાલિયા પોલીસે બંને આરોપીઓ સામે ગુનો નોંધી કાયદેસરની કાર્યવાહી હાથ ધરી છે અને વધુ તપાસ માટે તેમને ઓરિસ્સા પોલીસને સોંપ્યા છે.
