ફતેગંજ પોલીસ મથકની હદમાં આવેલા તારાબાગ સોસાયટીના એક મકાનમાં વિચિત્ર ચોરીનો કિસ્સો સામે આવ્યો છે.કિંમતી સર સામાન રોકડ રકમ સાથે તસ્કરો ડુંગળી કાજુબદામ જેવી ખાદ્ય સામગ્રીની પણ ચોરી કરી જતા આ ચોરી ચર્ચાનો વિષય બની હતી.
વડોદરા શહેરના ફતેહગંજ પોલીસ સ્ટેશન હદ વિસ્તારમાં આવેલી તારાબાગ સોસાયટીના ટી4 નંબરના મકાનમાં વિચિત્ર ચોરીની ઘટના બની હતી.માલિક કિરણ સોલંકીના મકાનમાં થયેલી આ ચોરીની ઘટના માત્ર મુદ્દામાલની દ્રષ્ટિએ જ નહીં, પરંતુ ચોરની ખાસ પસંદગીના કારણે ચર્ચાનું કેન્દ્ર બની છે.ચોરોએ ઘરના તાળાં તોડીને કુલ રૂપિયા 2 લાખ ઉપરાંતની ચોરીને અંજામ આપ્યો હતો.જેમાં સોના-ચાંદીના કિંમતી દાગીના અને રૂપિયા 70 હજાર રોકડાની સાથે તસ્કરો ચોરી કરીને પલાયન થતા પહેલા ઘરમાંથી ડુંગળી, કાજુ-બદામ જેવી ખાદ્યસામગ્રી પણ સાથે લઈ ગયા હતા.આ ઉપરાંત, બાળકોના સપના સમાન અને બચતનું પ્રતીક એવા પૈસા ભેગા કરવાના ગલ્લાને પણ બાકાત રાખ્યો ન હતો. ફતેહગંજ જેવા પોશ વિસ્તારમાં રજાક પૂરું કરીને તસ્કરો સહેલાઈથી પલાયન થઈ જાય તે વહીવટી તંત્રની નિષ્ક્રિયતા દર્શાવે છે.ત્યારે, તારાબાગના રહીશોએ તાત્કાલિક અસરથી સઘન પેટ્રોલિંગ શરૂ કરવા અને આ બેશરમ ચોરને પકડી પાડવા માટે કડક કાર્યવાહી કરવાની માંગ કરી છે.જેથી લોકોની મહેનતની કમાણી અને બાળકોની બચત સુરક્ષિત રહી શકે.
