ઉતરાયણ પર્વને હવે ગણતરીના દિવસો બાકી રહ્યા છે ત્યારે સમગ્ર ગુજરાતમાં પતંગોત્સવને લઈને યુવાનોમાં ઉત્સાહ અને થનગનાટ જોવા મળી રહ્યો છે. આ વચ્ચે વડોદરા શહેરના મોતી બાગ વિસ્તારમાં એક યુવાન દ્વારા 6 ફૂટથી લઈને 24 ફૂટ સુધીના વિશાળ કદના પતંગો બનાવવામાં આવી રહ્યા છે, જે લોકોમાં ખાસ આકર્ષણનું કેન્દ્ર બન્યા છે.
ઉક્ત યુવાન ગ્રાહકોના ઓર્ડર મુજબ વિવિધ કદના પતંગો તૈયાર કરી આપે છે. ઉતરાયણના દિવસે પતંગ રસિકો આ મોટા પતંગો ઉડાવી એકબીજાની પેજ કાપવાની મજા માણે છે. મોટા કદ અને મજબૂત બનાવટના કારણે આ પતંગોની માંગ ખાસ વધતી જોવા મળી રહી છે.
ઉલ્લેખનીય છે કે આ યુવાન સાથે તેના પરિવારના સભ્યો પણ પતંગ બનાવવાની પ્રક્રિયામાં જોડાયેલા છે. પરિવાર દ્વારા અનેક પ્રકારના પતંગો તૈયાર કરીને તેનું વેચાણ કરવામાં આવે છે. ઉતરાયણ પર્વ નિમિત્તે પરંપરાગત પતંગકળાને જીવંત રાખવામાં આ પરિવાર મહત્વની ભૂમિકા ભજવી રહ્યો છે.
