વડોદરામાં ઘરફોડ ચોરીનો એક ચોંકાવનારો બનાવ સામે આવ્યો છે. ચોરોએ પોતાની મોડસ ઓપરેન્ડી બદલી ફોર્મલ કપડાં પહેરી જાણે ઓફિસે જતાં હોય તેમ ઘરમાં પ્રવેશ કરી ચોરીને અંજામ આપ્યો હોવાના દ્રશ્યો CCTVમાં કેદ થયા છે.
સમા વિસ્તારમાં રહેતા ઉદ્યોગપતિ નરેશ પટેલના ઘરમાં થયેલી અંદાજે 18 લાખ રૂપિયાની ચોરીનો ભેદ ક્રાઇમ બ્રાન્ચે ઉકેલ્યો છે. પોલીસે CCTV ફૂટેજ, ટેકનિકલ સોર્સ અને હ્યુમન ઇન્ટેલિજન્સના આધારે કાર્યવાહી કરીને કુલ 74 લાખ રૂપિયાથી વધુનો મુદ્દામાલ જપ્ત કર્યો હોવાનું જાણવા મળ્યું છે.
પોલીસ તપાસમાં ખુલ્યું છે કે લગ્ન પ્રસંગે ઘરે લાવવામાં આવેલા દાગીનાની ચોરી કરવામાં આવી હતી. ઘટનાના સમયે એક આરોપી ઘરની બહાર લાગેલી લાઇટ બંધ કરતો CCTVમાં કેદ થયો હતો. વધુમાં, આ શાતીર ચોરોએ વડતાલની એક ધર્મશાળામાં રોકાઈને કુલ ચાર ઘરફોડ ગુનાઓને અંજામ આપ્યો હોવાનું પણ બહાર આવ્યું છે.
ક્રાઇમ બ્રાન્ચે જોધપુર (રાજસ્થાન)ના બે આરોપીઓને ઝડપી પાડી વધુ તપાસ હાથ ધરી છે.
